Gwen misayaw uban sa Rosquillos

CEBU, Philippines - Bisan pa sa mga problema nga giatubang karon sa suspendidong gobernador sa lalawigan sa Sugbo nga si Gwendolyn Garcia ug sa hulgang posibleng di na siya makabalik pa sa Kapitolyo misayaw gyud kini kagahapon uban sa contingent sa Lilo-an nga Rosquillos Festival. Kahinumduman nga sa nagsingabot pa ang Sinulog si acting governor Agnes Magpale giingong mibahad nga kung mosayaw si Garcia i-padlock niya ang buhatan niini.

Apan ang maong report gibakwi ni Magpale ug nagkanayon kini nga pwedeng makabalik sa iyang buhatan si Garcia inig human niini og sayaw sa Sinulog. Ang Rosquillos Festival maoy ika-22 ka contingent sa pre-interpretation. Unang misayaw ang mga dancer sa Rosquillos Festival ug nahugyaw ang mga tawo dihang migawas na si Garcia ug misayaw. Tataw kaayo nga wala maka-praktis ang gobernador apan  natapos niya kini nga walay kakulian.

Gikuyogan si Garcia sa pagsayaw ang iyahang umagad ug mayor sa Lilo-an nga si Duke Frasco. Lakip usab sa misayaw ang anak ug abogado ni Garcia nga si Christina Garcia-Frasco. (Brenda D. Batuto/EIM) (BANAT NEWS)