Diriyot magka-estampede

CEBU, Philippines - Tungod sa kagrabe sa pagdasok sa mga tawo daghang mga bata ang nangalisang ug nahadlok tungatunga sa nagdasok nga mga tawo ilabi na sa mga eskina duol sa Sinulog Grand Parade route.

Usa niini diha sa eskina sa R.R. Landon Street duol sa Cebu Normal University, pipila ka mga bata ang nanghilak gumikan kay naglisod sa pagginhawa tungod sa kainit ug kabaga sa mga tawo.

Bisan naglisod og sulod daghan gihapong mga tawo ang namugos maong wala kalikayi nga dunay mga nangasilo ug nagkatinubagay tungod niini. Hinuon wala mosangpot sa away ang nahitabo, nasuta nga wala nay nagbantay sa maong eskina gawas lang sa gibababag nga props sa usa ka contingent nga nakadugang sa problema. Usa sa nakadugang sa pagdasok ug dunay pipila nga diriyot matumbi sa mga tawo mao ang pagbutho sa mga artista diha sa mga floats sa nagkadaiyang tv stations.

Bisan adunay mga nagbantay gikan Philippine Army ug mga Reserve Officer Training Corps. (ROTC) ug ubang mga polis naglisud og kontrolar sa bul-og sa tawo nga nagtinukmuray dihang miagi na ang float sa mga artista. Si SPO2 Timoteo Quirol kinsa nadestino diha sa police assistance center sa may Mango Avenue nagkanayon nga nabalaka sila nga dunay mahitabong kasamok kagahapon sa gabii tungod sa kadaghang mga hubog.

Sa laing bahin, si Lieutenant Colonel Guy Santos Gabison III, Reserve Philipppine Army, Executive Officer 1901st Ready Reserve Brigade, 701st Community Defense Center, Reserve Command Defense Group (7RCDG),  Army Reserve Command (ARESCOM) kinsa maoy  nangulo sa sector 3 sa mga army reservist kagahapon nagkanayon nga usa sa mga problemang ilang nasugatan mao ang duot-duot sa mga tawo diin uban niini mangaway pa nila.

Hinuon matud ni Gabison nga maximum tolerance ug diplomasya ang ilang gipatigbabaw.

Matud ni Gabison nga diha sa ilang pwesto dunay usa ka menor de edad nga lalaki nga nasikop human kini giingong nanguot. Ang maong menor gikuha usab dayon sa iyang amahan. (Brenda D. Batuto ug Jennifer C. Mular, USJR Intern/EIM) (FREEMAN)