Duha naghikog

CEBU, Philippines - Duha ka mga lalaki ang gituohang naghikog sa managlahing dapit niadtong nakalabay’ng gabii.

Ang patay nang nadiskobrihan sa iyang mga kabanay mao si Saturino Saradon, 59, ulitawong guwang  ug molupyo sa barangay Tagnukan sa lungsod sa Borbon niadtong miaging alas 7:30 sa gabii.

Matud ni SPO2 Owen Baticuang sa Borbon Police dihang nahinabi sa Banat News si Saradon napalgan sa manghod nga nagbitay na nga may pisi sa liog nga gihigot sa kisame.

Ang mga kabanay sa namatay miingon nga depressed kaayo kini ug gituohan nilang mao kini hinungdan sa paghikog.

Samtang patay na usab nga nakit-an ug nagbitay gikan sa sagunting sa balay sa igsuon si Jovanni Gomez. Si Gomez mibisita sa igsuon aron mamista diha sa barangay Licos, dakbayan sa Danao.

Si PO1 Ace Rafols nga nahinabi sa Banat News miingon nga pipila na ka adlaw nga wala mouli sa ilang dapit sa barangay Langisig si Gomez ug diha lang magpundo sa balay sa igsuon hangtud nga nagpista. Wala masayod ang igsuon niini kung unsay problema o may gihambin ba kining sakit nga nakapa-aghat kaniya sa paghikog. (BANAT NEWS)