Binay moduaw ni Gwen sa kapitolyo
CEBU, Philippines - Gikatakdang mobisita kang Gov. Gwendolyn Garcia karong adlawa si Vice President Jejomar Binay.
Ang pagduaw ni Binay kabahin kini sa pagtambong niini sa Sinulog tungod sa imbitasyon ni Cebu City Mayor Michael Rama nga sakop sa partido nga United Nationalist Alliance kon UNA nga gipangulohan ni Binay.
Apan sigon sa nadawat nga impormasyon sa buhatan sa gobernador, posibleng sa hapon pa makaduaw si Binay sa Cebu City Sports Complex diin ipahigayon ang presentasyon sa matag delegasyon nga nisalmot sa Sinulog Grand Parade.
Wala hinuon maklaro kun ubanan ni Binay si Garcia sa pagsayaw unya niini sa Sinulog uban sa Rosquillos Festival sa lungsod sa Liloan.
Samtang gitug-an ni Garcia nga niining usa ka bulan na niya nga pagpabilin sa Kapitolyo subay sa suspension nga gipahamtang kaniya sa presidente, nakat-on siya sa daghang mga butang nga mahimo niyang magamit sa umaabot nga panahon. (BANAT NEWS)
- Latest
