Ikaduhang aksidente 2 patay, 15 angol

CEBU, Philippines - Duha ka mga pasaherong babaye ang patay ug laing 16 ang naangol human mobangga ang jeep pasahero-an nga ilang gisakyan sa gi-park nga 10-wheeler truck diha sa barangay Magdugo sa siyudad sa Toledo niadtong Biyernes sa alas-7  sa gabii. Ang mga pasahero nga patay diha-diha mao sila si Rosemarie Bangkok, 44, taga Das Lutopan Toledo City ug laing pasahero nga babaye nga wala pa mailhi ang pangalan ug gibana-banang 30-anyos ug 4’8 ang gitas-on.

Samtang ang drayber sa maong jeep pasahero-an mao si Edimar Alester, 29, ug laing 16 pa niini ka mga pasahero ang na-angol ug nalandig sa Toledo City District Hospital.

Ang drayber sa trak nga dunay kargang balas ug graba nga mao si Gunzen Labajo, 21, gikuti-kuti sa kapolisan gumikan kay wala kini makapakita og lisensya.

Matud ni PO3 Roxam Enerio sa Toledo City Police dihang nahinabi sa Banat News ang maong trak gi-parking diha sa dalan nga nag-atubang sa Lutopan dihang nadasmagan sa pasaheroan diha sa luyong bahin niini.

Tungod sa kakusog sa impact natay-og ang nag-parking nga trak ug ang mga pasahero nga sakay nangalabay ug nalamba.

Ang duha ka mga babaye nga namatay  human napiit  ug patay na pag-abot sa Toledo City District Hospital.

Samtang ang laing 16 ka pasahero ang gilahos usab kini sa tambalanan dinhi sa dakbayan sa Sugbo alang sa dugang medikasiyon. Ang duha ka mga drayber pulos nabalhog karun sa karsel sa kapulisan sa Toledo samtang padayon pa ang imbestigasyon ug gihikay ang kasong ipasaka batok kanila.

Mao na kini ang ikaduhang grabeng nahitabong aksidente karong semanaha human sa ngilngig nga pagbangga sa usa ka prime mover sa usa ka bus pasaheroan sa barangay Uling, sa dakbayan sa Naga. Atol sa aksidente sa Naga, onse ka tawo ang namatay ug kapin 50 ka pasahero ang naangol sa maong hitabo. Lakip sa namatay ang drayber sa prime mover nga nawagtangan og brakes. (BANAT NEWS)