Basura atimanon sa Sinulog — Montejo

CEBU, Philippines - Ang Department of Environment and Natural Resources (DENR-7) miawhag sa Local Government Unit (LGUs) ug mga balay patigayon nga  ipatuman  nga higpit  ang pagbutang  og  basurahan  sa ilang palibot ilabi na ning  panahon sa Sinulog.

Matud pa ni Dr. Isabelo Montejo, DENR-7 Regional Executive Director nga samtang  dugokon  sa minilyon ka  tawo  ang Sinulog  sa Sugbo kinahanglang  matngunan  sa kagamhanan  ug  sa katawhan  nga  dili mapasipad-an  ang kalikopan  pinaagi  sa hugaw  nga gikan sa katawhan  nga   makadaot  sa lawas  sa  mga  molupyo ning dakbayan.  

Pinaagi sa pagbutang og label sa mga sudlanan sa basura sama sa malata ug di malata o mga mahimo pang magamit nga mga basura, ang mga hugaw o mga basura sayon ra kaayo unya nga kolektahon.

Ang syudad sa Sugbo adunay gibana-banang 511 ka toneladang hugaw nga makolekta  sa  mga basurero  matag adlaw o 0.7 kilogram  nga hugaw sa matag tawo kada adlaw.

“You could just imagine the magnitude or volume of the garbage that will be generated for this occasion that we love to celebrate annually,” matud pa ni Montejo.

Gipasabot ni Montejo nga ang kasagarang wala makolekta ug wala malain-lain nga mga hugaw gipasagdan lang nga magkatag sa kadalanan o sa mga bukas nga mga dapit o  ngadto sa kasapaan ug estero nga maghatag  og risgo sa kahimsog ug kaluwasan sa palibot sa komunidad sa panahon  nga mobundak  na  ang  uwan.

Busa gidasig ni Montejo ang publiko nga magpakabana  sa kalikopan samtang maglingaw-lingaw sa selebrasyon pinaagi sa pagdala og mga trash bags alang sa biodegradable ug non-biodegradable nga  hugaw.

Lakip  niyang  gipahinumdom  sa tanan   nga magdala lamang og hustong  gidaghanon sa pagkaon ug ilimnon ug  ang  mga  sudlanan dad-on pagbalik  sa panimalay ug ang mga mahibilin nga  pagkaon hiposon  ug  dad-on  sa balay aron initon ug  makaon  gihapon  sa matag  pamilya, matud pa ni Montejo.  (BANAT NEWS)