Panagtagbo Festival sa Mandaue mabulokon

CEBU, Philippines -  Giisip nga malampuson ug mabulokon ang gipasiugdahang labing unang Panagtagbo Festival  street dancing contest kagahapon sa dakbayan sa Mandaue.

Ang Panagtagbo Festival kabahin sa kalihokan sa bisperas sa adlaw nga ang imahen ni Senyor Santo Niño uban sa imahen sa Birhen sa Guadalupe mobisita sa imahen ni Senyor San Jose sa pagsimbolo sa panaghiusa sa Balaang Pamilya.

Ang street dancing nga natigayon pinaagi sa usa ka indigay ug gisalmutan usab sa pito ka mga contingents gikan sa 27 ka barangay sa maong dakbayan.

Nagsugod ang street dancing sa barangay Ibabao ug mipadayogdog sa dalan Sotero Cabahug ug gitapos pinaagi sa usa ka showdown sa hawanan sa atubangan sa city hall.

Dagkong ganti ang giandam sa kagamhanan sa dakbayan sa Mandaue nga giabagan usab sa Taga Mandaue Inc. nga gilangkoban sa P100,000 alang sa unang mananaug, P50,000 alang sa ikaduha ug P25,000 usab alang sa ikatulong mananaug.

Si Mayor Jonas Cortes nga maoy nangulo sa mga opisyal sa kagamhanan sa pagsaksi sa maong kalihokan iyang gipadayag ang hilabihang kahinangop tungod sa nakita nga talagsaong kalampusan sa maong kalihokan.

Si Edwin Ermac ang pangulo sa Traffic Enforcement Agency of Mandaue (TEAM) miingon nga nakamugna og kabug-at sa trapiko ang kalihokan, susamang gibug-aton sa trapiko ang masinati karong hapon atol na sa “Traslacion” nga pagahimoon gikan sa Basilica Minore del Santo Niño padulong sa National Shrine of St. Joseph Parish sa Mandaue. (/EIM) (BANAT NEWS)