Driver wa mosunod sa restriction code

CEBU, Philippines -  Kuwang sa eksperiyensya ug ang giingong depektosong brakes maoy usa sa gisusi nga hinungdan sa disgrasya nga nakapatay og napulo ka tawo ug kapin sa 50 ka tawo ang naangol sa Uling, Naga City niadtong Miyerkules sa hapon.

Kini maoy nakita sa joint-inspection nga gihimo sa Land Transportation Franchising and Regulatory Board-7 ug sa Land Transportation Office-7 diha sa accident site kagahapon.

Matud pa ni LTO-7 regional director Raul Aguilos, nakita nila nga si Antonieto Omagay, Jr. , ang drayber sa prime mover nga nakadasmag sa JS Calvo Bus wala tuguti base sa iyang lisensya nga maka-drive og articulated motor  vehicle sama sa iyang gidalang trailer truck.

Sumala pa ni Aguilos base sa restriction code diha sa lisensya ni Omagay, gitugotan lang siyang makamaneho og  mga sakyanan nga dili molapas og 4,500 kilogramos. Ang lisensya ni Omagay adunay restriction code 2 and 3.

Ang prime mover nga  gimaneho ni Omagay matud pa ni Aguilos  usa ka klase sa articulated vehicle, lapas na kini sa 4,500 kilogramos ug nabutang na kini sa restriction code 8.

"Meaning wala siyay skill nga mo-drive og articulated vehicle like prime move trailer. Lack of skills to drive an articulted vehicles was a probable cause of accident,” pasabot pa ni Aguilos.

Nasayran usab sa LTO nga ang lisensya ni Omagay na-isyu niadto pang 2011 , nagpasabot kini nga kung basehan ang lisensya, wala pay duha ka tuig si Omagay naka-maneho og articulated motor vehicle.

Samtang si LTFRB-7 regional director Ahmed Cuizon sa iyang bahin miingon, gimando niyang kinahanglang mopailawom sa safety seminar ug drug testing ang mga drayber sa nalambigit nga bus company.

Sumala pa ni Cuizon adunay 16 ka bus ang maong kompanya nga nagbiyahian sa habagatang bahin sa Sugbo.

Nasayran usab ni Cuizon gikan sa mga residente sa maong dapit nga ang mga truck helpers ni Omagay nanglayat nang daan samtang nagdulhog na ang trak.

"Naay mga witness nga nisulti nga sa wala pa nahitabo ang insidente, nangambak na ang mga helpers sa truck," matud pang Cuizon.  (BANAT NEWS)