Multicab vs. de karga 8 angol

CEBU, Philippines - Walo ang naangol  nga naglakip sa 4 anyos nga bata human madasmag ang  gisakyan  nilang multicab batok  sa usa ka trak de karga  didto sa highway sa barangay Tinaan siyudad sa Naga kagahapon sa alas 11:30 sa buntag.

Ang mga biktima mao sila  si  Gunenever Candol, hingkod, minyo  nga taga Lutak, Naga, ug  drayber  sa multicab  nga  pasaheroan, iyang  mga  pasahero  nga sila  si Cecilia Baclay, 46, minyo, nga taga Dapdap Poblacion-3, siyudad sa Carcar,  ug  kwatro anyos nga anak niining lalaki nga  si Matt Anthony Baclay.

Alana Ruthmar, 21, dalaga, taga siyudad sa Carcar, Joyce Cantal, 46, minyo taga Tinaan, Naga, Yolly Dumlao, 57, minyo, taga  Lakaron, lungsod sa San Fernando, Labingpuno Andre, hingkod, minyo ug guwardiya sa Petronas Gas Station sa Langtad, Naga ug Lee Ann Villafuerte, 25, dalaga, nga taga lungsod sa San Fernando.

Samtang ang drayber sa  trak de karga mao si Virgilio Jumalon Seciban, 39, minyo, nga taga Upper Mojon, siyudad sa Talisay.

Si PO2 Rongie Nadura sa Naga City Police  Station mibutyag sa Banat News  nga gikan sa siyudad sa Sugbo ang  multicab  paingon sa Carcar, dihang pag-abot  niini  sa nahitaboan nakatagpilaw  ang  drayber  niini nga si Candol   nga gituohang  giatake  sa high blood  hinungdan wala na  makakontrol  sa manobela  sa  sakyanan ug   mikawat kini  sa pikas  lane  sa karsada.

Nahiatol  usab  nga maoy pag-agi sa gikasugat  niini nga trak  de karga   nga maoy  hinungdan  sa ilang  pagdinasmagay  nga  misangpot  sa pagkaangol  sa    mga  pasahero  niini.

Ang mga biktima daling gihatud ngadto sa South General Hospital. Samtang ang drayber sa de karga boluntaryo usab   nga  mitahan  sa iyang  kaugalingon  ngadto  sa kapolisan  ug nagpaabot sa tukmang sumbong nga ipasaka batok  kaniya  sa  mga  biktima. (BANAT NEWS)