De karga vs. awto 4 angol

CEBU, Philippines - Upat   ka  sakop  sa usa  ka  pamilya  ang   na-angol   dihang  nadasmag ang ilang gisakyan sa gikasugat nga trak de karga  didto sa highway sa barangay Cadulawan lungsod sa Tabogon niadtong Lunes sa alas 2:00 sa hapon.

Ang mga biktima mao   si  Rene Joseph Sison, 42, minyo  ug driver  sa   Kia Carens nga taga Busay siyudad sa Sugbo,  Gila Sison, 43, nga iyang asawa  uban sa ilang  inahan  nga  si  Silveria Caminade, 84, ug  manghud  niini  nga si Rowena Caminade, 46, nga taga Bantayan Island.

Samtang ang gika- engkwentro nga trak de karga   mao ang  Isuzu Forwarder, kolor puti, nga   kargado og isda nga gimaneho ni  Anastacio Ocio, 62, minyo, ug taga Hagnaya lungsod sa San Remegio.

Si PO2 Jonrey Frias sa Tabogon Police  Station  mibutyag  sa  Banat News   nga ang Kia Carens  gikan sa amihanang bahin sa lalawigan  samtang  ang trak de karga gikan   usab  sa  kaatbang  nga direksyon.

 Dihang pag-abot sa maong lugar milihay sa nag-parking nga sakyanan ang  Kia Carens  apan maoy  nabagungatan  niini  ang  trak  de karga  nga  nagbaguros  sa kakusog  nga  misangpot  sa ilang  pagdinasmagay.

Nalabay  og  pipila ka metros ang Kia Carens nga   misangpot  sa pagpangasamad  ug  pagpangabun-og  sa  mga  nagsakay  niini.

Gipanghatud  dayon  ngadto  sa tambalanan  ang  mga  biktima  samtang  ang  drayber  sa trak  de karga mitahan  usab  ngadto  sa kapolisan  ug nagpaabot  sa tukmang  kiha  nga  ipasaka  batok  kaniya. (WC)(BANAT NEWS)