Hugot nga seguridad alang sa mga turista

CEBU, Philippines - Seguridad sa mga langyaw’ng turista ug lokal nga dumoduong gipahugtan sa kapolisan sa dakbayan sa Lapulapu.

Matod pa ni Lapulapu City Police Office Director, Sr. Supt. Rey Lyndon Lawas mipaubos na sa full alert status sa iyang mga sakop alang sa nagsingabot nga kasaulogan sa pista Sr. Sto. Niño ug Sinulog.

Dungan usab niini ang pagsugod na sa election period dihang gipatuman ang Comelec gun ban sugod niadtong Enero 13.

Gipahimutang na ni Lawas ang iyang mga sakop ilabi na ang mga sakop sa Tourist Police nga maoy mag-monitor sa mga langyaw’ng turista nga ania sa dakbayan sa Lapulapu.

Nakatabang ang 41 ka mga bag-ong personnel sa PNP nga gidestino sa kapolisan sa Lapulapu ug ang 45 ka mga bagitong polis nga mag- Field Training Program sa pag-monitor sa kahapsay ug kalinaw sa selebrasyon sa Balaang Bata.

Pabutangan usab ni Lawas ang mga dapit nga agian sa “fluvial procession” karong Sabado nga hugopan sa mga deboto ni Sr. Sto. Niño diha sa Mactan Channel.

Samtang si Embler Mendoza ang bag-ong pangulo sa Lapulapu City Tourism mipadayag nga base sa ilang monitoring sa mga hotels ug resorts puno na kini sa mga bisitang lokal ug mga langyaw’ng turista.

Matud pa ni Mendoza nga sa tugpahanan pa lang gisugat na sa mabulokong sayaw sa Sinulog ang mga balikbayan ug mga turista diin makita sa mga panagway sa mga bisita ang kalipay. (EIM)(BANAT NEWS)