Namatay sa kakulba

CEBU, Philippines - Usa ka 51-anyos nga school bus driver ang giatake sa iyang sakit sa kasingkasing ug namatay human kini giingong gitulis diha sa may dalan South Road Highway, Barangay Bulacao, dabayan sa Sugbo, alas-5 kagahapon sa buntag.

Ang biktimang si Leonardo Sarabia, Jr., nga nagpuyo sa Villa Zacate, Barangay Basak-Pardo, ang gideklarar nga dead on arrival sa Cebu City Medical Center diin siya gidala human siya giingong giatake sa kasingkasing.

Ang iyang asawa nga si Flordelina Sarabia, sa report sa radio dyHP, misaysay nga nag-atang og sakyanan ang iyang bana aron mo-report na unta sa trabaho sa dihang giduol kini sa usa ka lalaki ug gitionan og pusil dungan sa pag-deklarar og tulis.

Gikawat niini ang pitaka sa biktima dayong sibat palayo sa maong lugar samtang ang biktima natumba ug gidala sa ospital.

Ang hepe sa Theft and Robbery Section sa Cebu City Police Office miingon nga base sa death certificate sa biktima, namatay kini sa cardiac arrest.

“Posible nahadlok ‘to ug taman maong gi-atake sa kasingkasing,” matud pa sa hepe sa TRS nga si Sr. Insp. Rolando Pinili.

Ang imbestigador sa TRS nga si SPO2 Henry Estoy ang nagkanayon nga ila pa unyang pakig-estoryahan ang banay sa biktima aron makakuha og detalye sa maong hitabo ug masiguro nga gitulis gyud        kini.

Ang mga pulis gikan sa Homicide Section ang unang niresponde sa maong hitabo ug gi-turn over ang kaso sa TRS human madawat ang taho nga gitulis kini. (BANAT NEWS)