59-anyos patay sa sulod sa pension house
ORMOC CITY, Philippines – Usa ka 59-anyos nga lalaki ang gituohang namatay sa sakit sa kasingkasing samtang kini gidudahang nakig-sex sa usa ka batan-ong babaye sulod sa usa ka pension house sa nahisgutang siyudad.
Ang maong lalaki mi-check in sa maong pension house uban sa usa ka batan-ong babaye, apan nahibulong nalang ang roomboy nga napupos nalang ang ‘short time’ niini wala gihapon mo-check out ang lalaki hinungdan nga ilaha kining gisusi ug nakugang nalang nga patay na kini ibabaw sa kama.
Matud pa ni Chief Insp. Ibrahim Jambiran, ang bag-ong hepe sa kapolisan sa maong lungsod nga ilang nadiskubrehang adunay tambal alang sa sakit sa kasingkasing ang maong lalaki ug gikompirmar sa doktor nga ilang gidad-an sa patay’ng lawas nga heart attack ang gikamatyan niini.
Sumala pa sa room boy nga unang migawas ang kaubang batan-ong babaye sa namatay usa ka oras sa wala pa kini madiskubrehing wala nay kinabuhi.
Wala say nakaila sa maong babaye tungod kay magsige lang og pangalyas ang mga babaye nga magsulod-gawas sa maong pension house apan gihulagway nga kapin pa lang 20-anyos apan di molapas sa 25-anyos ang maong babaye.
Nagdumili si Jambiran paghingalan sa namatay subay usab sa hangyo sa mga anak sa namatay nga kung mahimo i-sekreto lang ang pangalan sa ilang amahan. Ang duha ka mga anak nga lalaki sa maong namatay pareho nang mga nurses. (/EIM) (BANAT NEWS)
- Latest
