Suspetsadong tulisan nadakpan

CEBU, Philippines - Nadakpan sa hiniusang operasyon sa kapolisan sa lungsod sa Compostela ug siyudad sa Danao ang suspetsadong tulisan nga armado samtang nagkaon kini sa usa ka tindahan didto sa barangay Magay sa Compostela kagahapon sa alas 10:30 sa buntag.

Ang nadakpan nga suspek mao si Jose Abadila Quinain, 33, ulitawo ,  nga  taga  barangay Sabang siyudad sa Danao,  kinsa  may  arrest warrant sa kasong pagpanulis sa siyudad sa Danao.

Si Danao Regional Trial Court (RTC) Branch 25 Judge Jery Dicdican maoy miluwat og arrest warrant batok sa suspek.

Si SPO4 Wilfredo Caturza sa Compostela Police  Station mibutyag  sa Banat News  ang usa sa mga gibiktima sa suspek maoy nakakita niini nga nagkaon og pamahaw sa usa ka kan-anan sa barangay Magay hinungdan gisumbong  dayon niya  kini   sa kapolisan sa Danao.

Ang kapolisan  usab  sa Danao   nakig-alayon  dayon sa kapolisan sa Compostela ug didto gilusad dayon nila ang hiniusang operasyon   sa  pagsilbi  sa arrest warrant.

Matud ni SPO4 Caturza   nga samtang gisilbi  nila ang arrest warrant ,  ila  dayon  girikisa  niini  ang  mga  bulsa  ug hawakan   diin  didto  nasakmit  nila  ang  gitangkil  nga  kalibre 38 nga   revolver   nga adunay duha ka buhing bala sa 357 sulod sa cylinder niini.

Ang suspek gidala dayon  ngadto  sa buhatan sa kapolisan sa Danao   diin  siya ideretso  og  balhug  sa prisohan. Ang   maong suspek dugay  na  nga  gipangita  sa kapolisan  apan gumikan sa kaidlas, wala dayon ikasilbi  kaniya  ang  iyang  arrest  warrant.( /WC)  (BANAT NEWS)