Sugbo TV gikagubtan na sab

CEBU, Philippines - Nagubot na usab ang Sugbo TV dihang gisulayan og hakot sa Provincial General Services Office (PGO) ang  mga  kahimanan  sa Sugbo TV  kagahapon  sa hapon.

Sila  si   Eva Encavo,  nga maoy  bag-ong hepe  sa PGSO  maoy nanguna  sa grupo nga  mihakot  sa  mga  ekipo   uban ni Doy Aloba .

Sigun pa ni Encavo nga ang  maong  mga  kahimanan  dad-on  unta  nila  ngadto  sa legislative  building kay  una  kini  nilang  giimbentaryo ang tanang mga kahimanan sa Sugbo TV.

Apan  gipugos  nila  pagguba  ang  kandado  sa pultahan  sa lawak  nga  nahimutangan  sa maong  mga  ekipo  kay  nawala  ang  yawe  niini human pasirad-i  ni Acting Gov. Agnes Magpale niadtong Disyembre 21, 2012.

Kauban  ni  Encavo  sa maong  imbentaryo  mao  ang representante sa Commission on Audit sa probinsya, pipila ka mga armadong polis, kawani ni Magpale ug bokal Arleigh Sitoy ug ingon man representante  ni Elizabeth Francia ang chief of staff ni suspended Governor Gwendolyn  Garcia.

Lakip  usab  nga  mikuyog  sa grupo  ni Encavo  mao   sila si Jaime Yap, Jeffrey Saromines, nga  maoy  mihakot   sa  mga computer  equipment   kay  ilang  ibalhin  ngadto sa   legislative building  “for safe keeping”  kuno.

Apan   kalit  nga miabot ang duha sa mi-resign nga kawani sa Sugbo TV nga si Felix Lucabon ug Dionesis Canonigo nga mikuwestiyon sa pagpagawas sa   maong mga   kahimanan  nga   wala  katambongi og  kawani  nga gipiyalan  niini kinsa  maoy  angay  manubag kun  may mawagtang sa  maong  mga  ekipo.

Unya   mitumaw usab  si Francia kinsa   mihiwasa  sa  kasuko   kay  matud  pa segun  sa gipananghid kaniya   nga usa  lang  ka   “physical inventory” ang    himoon  nila  ni  Encavo ug   dili  kay  ang  paghakot  sa maong  mga kahimanan  aron ibalhin  ngadto  sa legislative  building.

Gitataw ni  Francia   nga dili makiangayon ang gihimo sa PGSO sanglit wala siya maghatag og authorization ngadto kang Jaime Yap nga usa ka kanhi driver sa Sugbo TV ug Jeffrey Saromines nga usa ka on the job training sa Sugbo TV aron hakuton  ang  mga  kahimanan  sa Sugbo TV.

Tungod niini, giuli  sa  mga kawani sa PGSO  ang  maong  mga  kahimanan  ngadto  sa editor’s room  sa Sugbo TV. (/WC) (BANAT NEWS)