Gipusil bala milapos sa likod agi sa dughan

CEBU, Philippines - Kritikal  ang kahimtang  sa usa  ka ulitawo human kini pusila  sa  iyang  silingan ug  ang  bala  nga  mitaroy sa iyang dughan  milapos sa  iyang  bukobuko didto  sa iyang  balay  sa  Sitio Tapon barangay Matab-ang siyudad sa Toledo niadtong Sabado sa alas 7:20 sa gabii.

Ang biktima mao si Romeo Villanueva, 48, ulitawo apan dunay kapuyo,  nga  nagpuyo sa maong lugar, samtang  ang  suspetsado  mao  ra usab  si Simplecio Nengasca Jr., alyas Pugot nga  iyang  silingan. Si SPO4 Gil Lastimosa sa Toledo City Police Station  mibutyag  sa  Banat News  nga ang biktima  nanihapon  niadtong tungora  uban  ni   Jean Guisungan nga  iyang  kapuyo sulod  sa ilang  kusina  dihang  kalit  nga misaka  ang suspek  ug  sa walay  daghang  estorya  giluthang  ang  biktima.

Naigo  sa walang  dughan  ang  biktima   ug  ang  bala  milapos  sa iyang  bukobuko.

Dihang nakita sa suspek nga naigo ang biktima nagdali kining nigawas sa balay ug misibat  dayon pahilayo  sa maong  dapit.

Ang biktima gitabang sa iyang mga silingan ug gihatud ngadto sa Toledo City District Hospital apan gibalhin  usab  dayon  sa tambalanan  sa  dakbayan sa Sugbo.

Ang kapolisan padayon pa sa ilang hot pursuit operation  batok  sa suspetsado ug pagtino sa motibo sa  maong  krimen. (/WC)(BANAT NEWS)