Lawas patay nabulit sa linubaan

CEBU, Philippines - Naputos sa samad dinunggaban ang  lawas sa usa ka mag-uuma nga napalgang patay nga  nagbuy-od  sa kasagbotan didto sa bukirang bahin sa barangay Bae sa lungsod sa Sibonga kagahapon sa alas 6:45 sa buntag.

Ang biktima mao si Maximo Solatorio Largo, 62, ulitawo, usa ka mag-uuma ug nagpuyo sa maong lugar, samtang  wala  pa hisayri  kinsay  nagpatay  niini.

Si PO3 Ederlino Bacusmo sa Sibonga Police Station  mibutyag  sa Banat News  nga  nasayran  nila  ang  maong  hitabo  gikan  sa  usa ka Geraline Clarion, hingkod,  kinsa  maoy  misumbong  kanila  bahin sa iyang  nakit-an  nga  patay’ng  lawas  sa biktima nga nagbuy-od   sa kalibonan  daplin  sa dalan  samtang  naglakaw  siya  sayo  sa buntag.

Sa pagrespondi nila ni PO3 Bacusmo ug mga kaubanan  nasuta   nila  nga  naputos sa samad dinunggaban ang  lawas sa biktima nga maoy nakaingon sa hinanali  niining kamatayon

Gituohan sa kapolisan nga Sabado  pa  sa gabii patya  ang   biktima ug posibling   giatangan  kini  sa kriminal   sa maong  dapit.   

Padayon pa  nga  giimbistigar  sa kapolisan  ang  maong  hitabo  aron  pag-ila  sa kriminal  ug  pagtino sa motibo  sa maong pagpatay. (BANAT NEWS)