Gidunggab sa akyat bahay

CEBU, Philippines - Giingong mokabat ngadto sa P900 mil ang kantidad sa kwarta nga nadala sa tulo ka mga gidudahang “akyat bahay” milungkab sa balay sa usa ka biyudo nga ilaha usab gidunggab niadtong Sabado sa buntag sa barangay Pandacan, lungsod sa Pinamungahan.

Ang biktima mao si Alfonso Pama Virao, 81-anyos, residente sa maong dapit ug ang giingong mga kawatan duha ka wala mailhing mga lalaki ug usa ka babaye kinsa parehong nagsul-ob og bonnet.

Sa imbestigasyon sa kapolisan giingong si Virao nakadungog og kusog nga lagubo hinungdan nga nakamata kini ug misusi sa gigikanan sa maong lagubo.

Giingong nakita pa sa biktima ang mga kawatan ug gipangutana pa niini kung unsay ilang gibuhat apan giingong usa sa maong kawatan mikuha og hait nga butang ug giduslak ngadto sa walang bukton sa biktima.

Human sa maong hitabo ang mga kawatan daling midagan paingon sa gawas ug diha miagi sa likod nga pultahan sa balay.

Ang nahisgutang kwarta ni Virao lakip kadto sa P2 milyones nga halin sa lote sa iyang asawa nga gibaligya niadtong milabay’ng tuig.

Si Senior Inspector Almirante Bacayo, hepe sa Pinamungahan Police Station natahap nga ang mga kawatan kaila lang ni Virao.

Sa ocular inspection nga gipahigayon sa mga polis nasuta nga walay nahitabong force entry sa pagsulod sa mga kawatan.

Apan si Virao nangangkon nga ang kawatan migamit og kutsilyo ug milugit sa pultahan sa likod nga bahin sa balay hinungdan nga nakasulod kini.

Matud sa hepe nga wala maihap niining ulahi lang ni Virao kung pila ang eksaktong kantidad sa iyang kwarta nga nahibilin.

Ug gituohang dunay miunay og kawat sa kwarta sa biktima kinsa giingong hakog.

Ang kapolisan nagpahigayon og follow-up nga imbestigasyon sa insidente. (BANAT NEWS)