Flyover sa Subangdaku giayo sakyanan naghuot

CEBU, Philippines - Nasinatian  sa  mga motorist  ang  kahinay   ug  kahuot  sa dagan  sa trapiko  sa may  flyover sa barangay Subangdaku  kagahapon  ug  karong  adlawa tungod  kay  giayo  ang  gamay  nga depekto  niini.

Maoy  hinungdan  nga  giawhag sa  mga tinugyanan  sa     Department of Public  Works and Highway (DPWH) 7   ang  mga  motorista   ug  ang  publiko  nga  pailoban  lang  sa  makadiyot  nga  panahon   ang kahasol  nga  ilang  masinatian  karon  tungod  niining pagtak-op  nila  nga temporary sa maong  flyover.

Ang  pagsira  sa maong  flyover  gihimo gikan  sa alas 9:00  sa buntag  hangtud  sa alas 5:00  sa hapon  ug  gipaningkamotan  nila  nga  karong  adlawa  Domingo mahuman na  ang  pagpanapak  sa  mga libaong  niini  aron  mahibalik  ang  normal  nga  dagan  sa mga sakyanan  sa maong  lugar.

Si Engineer  Renult Ricardo nga maoy assistant district engineer sa DPWH 7  miingon nga ilang gituyo nga adlaw nga Sabado ug Domingo ang pag-ayo sa nahisgotang flyover   aron  dili  makahatag og kahasol sa mga motorista  lahi  sa  adlaw’ng  tingklase ug  tingtrabaho.

Matud  pa ni Ricardo nga  gawas  sa pagpanapak  giayo  usab  nila ang   depektoso na nga expansion joint sa  maong  flyover   aron pagsiguro nga kalikayan ang aksidente sa mga motorista.

Kini  tungod  kay  matud pa   niya  nga  naligas na ang center expansion joint  ug  ang anchor bolt  wala na magtapot  sa steel plate niini  busa  ila kining  gibalik  sa naandan. (WC)(BANAT NEWS)