Tomas gikataw-an ni Gwen

CEBU, Philippines - Puwerting  katawaa ni suspendidong  gobernador Gwendolyn  Garcia sa  awhag  ni  Kongresista  Tomas  Osmeña  sa  pagpakanaug  kaniya  gikan  sa Kapitolyo  ug  dili  siya  angayang  mag-martyr.

Si  Garcia  mibahakhak  pagkadungog  niini  sanglit  alang  kaniya  nakulit  na sa alimpatakan  sa mga Sugboanon  nga kamatayon  lamang  ang makahaw-as  kaniya  gikan  sa Kapitolyo.

Si Garcia gawas  nga nagpasalamat   kang  Osmeña sa paghingan  niini  kaniya  nga  martyr,  iya  usab  nga gikomedyahan ang  kongresista sa  habagatang  distrito  sa dakbayan  sa Sugbo  nga angayan  kaayo  kining  mag-pari  kay  namunyag  naman  og  ngalan  niya.

Apan dihang mipasabot ang tigpamaba sa LP nga si manlalaban  Democrito Barcenas nga dili pwersahon sa pagpakanaug ang gobernador kay mahulagway na unya sa mga Sugboanon nga ang gobernador usa ka martyr, si Garcia miingon nga nagpakita na usab kini sa makalilibog nga baruganan sa LP.

Kini tungod kay  matud  pa  ni  Garcia   nga  lahi kini sa unang mga pamahayag ni PRO-7 Regional Director  Marcelo Garbo nga kinahanglang pugson siya sa pagpakanaug sa Kapitolyo pinaagi sa kapolisan uban sa SWAT team.

Samtang  ang kang acting governor  Agnes  Magpale  nga  plano  mao  usab  ang  pagputol  sa linya  sa kuryente  ug  tubig  sa opisina  sa gobernador  aron  mopahawa  si  Garcia.

Gumikan  niini  nakaingon  si Garcia  nga  nagkasuhag  ang  baruganan  sa LP, kay  adunay gusto  nga  pugson  siya  sa pagpapahawa samtang  ang  uban  usab gusto  nga pasagdan  lang  siya  kun mohawa  ba  siya  o  dili.  (WC)(BANAT NEWS)