Napaakan og bitin patay

CEBU, Philippines - Wala panimasli ug napaakan gyud og bitin ang 3-anyos nga batang lalaki nga napalgang patay sa kasagbutan sa luyong bahin sa St. James Amusement Park sa Reclamation Area sa siyudad sa Mandaue niadtong Biyernes sa hapon.

Kini base sa resulta sa awtopsiya nga gihimo ni Dr. Nestor Satur ang medico legal sa PNP Crime Laboratory sa patay’ng lawas ni Jian Jumawan.

Una niini, nagduda ang mga ginikanan ug kabanay sa bata nga gipanimaslan sila sa pamilya sa silingan tungod sa paglugos sa amahan sa bata sa anak sa ilang silingan niadtong Disyembre 26.

Gidakop ang amahan ni Jian nga si Arvin niadtong Disyembre 27 samtang ang gilugos niining 3-anyos usab nga anak sa ilang silingan padayon pang gitambalan tungod sa impeksyon bunga sa paglugos kaniya.

Niadtong Biyernes sa hapon, duha ka mga trabahador sa maong amusement park nga naglimpyo sa luyong bahin sa maong parke ang nakadiskubre sa   walay sapot nga bata nga nagbuy-od diha sa kasagbutan.

Tungod sa pagduda sa banay’ng Jumawan nga gipanimaslan ang bata gimando sa kapolisan ang pagpa-awtopsiya sa patay’ng lawas ug diha makit-i ni Dr. Satur nga walay timailhang may bun-og o samad ang bata nga posibleng nakaingon sa kamatayon niini.

Duha ka mga nagtupad nga gagmay’ng buslot (samad) diha sa tuong apapangig sa bata nga gituohan ni Satur nga inagian sa tango o bangkil sa usa ka halas o bitin.

Apan bisan pa man sa siyentipikong paghiling sa lawas sa bata, ang mga kabanay niini dili motuong bitin maoy mipatay sa bata.

Kini tungod kay niadtong Biyernes sa hapon dunay residente nga nakakita og tawong walay sinina ug nagsuot og pink nga shorts nga may giguroy nga bata padulong sa kasagbotan sa maong lugar.

Ang maong dapit diin mapalgi si Jian mao usab ang dapit diin giingong nahitabo ang pagpanglugos sa amahan niini sa 3-anyos nga kaduwa ni Jian.

Sumala pa nga ang pamilya sa batang gilugos giingong mibahad nga manimalos sila sa amahan ni Jian.

Si Insp. Ramil Morpos, hepe sa Homicide Section sa Mandaue City Police Office mibutyag nga karong duna nay autopsy report ug napamatud-ang wala pasipad-i ang bata, gisirad-an na nila ang maong kaso.

Hinuon sumala pang Morpos mahimo pang modangop sa laing ahensya sa gobiyerno ang banay ni Jian kung dili gihapon sila makombinsir sa autopsy    report.

Ang nahisgutang mga pamilya pulos nagpuyo sa payag-payag diha sa center island sa usa ka dalan sa maong lugar nga diin duna pay daghang bakanteng lote nga kalibonan.( EIM) (BANAT NEWS)