Capitol di motabang sa mga contingent kay bankrupt
CEBU, Philippines - Gibutyag ni Acting Governor Agnes Magpale nga andam untang motabang ang kagamhanan sa lalawigan sa mga contingent sa lalawigan alang sa Sinulog 2013 apan unsa may ikatabang niini nga nabangkarota man ang panudlanan sa Kapitolyo.
Gani matud pa ni Magpale naglibog pa siya karon kun asa sila mangapkap sa kantidad nga P500,000 nga ilang gisaad nga hinabang alang sa Sinulog Foundation Inc.
Ang maong pamahayag gihimo ni Magpale agi og pagpasabot kang Liloan Mayor Duke Frasco kinsa nagduda nga wala gyuy laraw ang acting governor nga motabang sa Rosquilos contiNgent sa ilang lungsod nga mosalmot sa Sinuog Grand Parade sa umaabot nga Enero 20. Gumikan niini si Magpale mihagit hinoon kang Mayor Frasco nga mobisita sa iyang buhatan sa Kapitolyo aron makakita kini sa record sa tinuoray’ng kahimtang sa panudlanan karon sa kagamhanan sa lalawigan.
Gipasabot ni Magpale nga ganahan gyud unta siya nga motabang apan ang naka- problema lang kay walay pundo ang panudlanan sa Kapitolyo.
Gani matud ni Magpale nga sa pagkakaron nagpaabot pa sila sa share sa Kapitolyo sa Internal Revenue Allotment (IRA) aron pagtubag sa daghang obligasyon niini.
Sa samang higayon gipaabot usab ni Magpale ang resulta sa iyang gihangyo sa Bureau of Local Government and Finance (BLGF) nga mopahigayon og major audit sa panudlanan sa Kapitolyo.
Nagkanayon ang acting governor nga iya kining gihimo tungod kay dili gyud motuo ang kampo ni suspended governor Gwendolyn Garcia kun ang provincial treasurer maoy mosulti sa tinuoray nga kahimtang sa panudlanan sa Kapitolyo.
Nunot niini gipahibawo ni Magpale nga hangtud karon padayong nagbaha ang mga negosyante sa nagkalainlaing supply alang sa kagamhanan sa lalawigan nga motumaw sa iyang opisina kay wala kabayri sa Kapitolyo.
Ang maong mga bayronon nagkantidad og minilyon ka pesos, sumala ni Magpale. (BANAT NEWS)
- Latest
