Kabalayan sa G. Ouano demolison

CEBU, Philippines - Andam na ang  kagamhanan  sa dakbayan  sa Mandaue  nga  palapdan  ang  dalan Gerardo Ouano sa barangay Ibabao,   pinaagi sa pagpaguba sa mga estraktura   sa kadaplinan  sa maong  karsada.

Si Atty Giovanni Tianero, ang city legal officer sa kagamhanan sa maong dakbayan mibutyag sa  mga tigbalita   nga  mokabat  sa 27 ka mga estraktura ang  apektahan  sa  maong  proyekto.

Gipasabot niya nga dugay na  nilang gipadad-an  og  suwat  ang  mga  tag-iya  sa maong  estraktura  nga naglakip  sa  mga  puloy-anan  ug  mga  tindahan  sa pribadong  mga  molupyo.

Kini   aron  nga  makapangandam  sila  pinaagi  sa pagguba  sa  maong  mga  estraktura  sa  ilang  kaugalingon  o  kaha  magpaabot   sa demolition  team  sa kagamhanan  nga maoy  molumpag  niini.

Matud  pa  niya  nga niadtong  Disyembre gipahibawo  na  ang  mga  hingtungdan  nga  palapdan  sa kagamhanan  ang  maong  karsada  ug  silang  anaa  sa kadaplinan  niini  kinahanglang  mopahawa  na.

Ang  maong  karsada paingon  sa  barangay  Opao  gamay  kaayo  busa  kinahanglan  kining  palapdan.

Pipila  sa  mga apektohan nga mga balay  gipanag-iya  nila ni Jerry Omega,  Pedro Lasiao, Warren Mendaros, Erwin Mendaros ug Boyet Deo.

Wala maghisgot ang  kagamhanan  kun  may  madawat  bang  pinansyal  nga  bayad  o  hinabang  ang  mga  tag-iya  sa maong  mga  estraktura   nga  maguba. (/WC) (BANAT NEWS)