Byron mihimakak nga nangasaba ni Habin

CEBU, Philippines - Gipanghimakak ni Byron Garcia, kanhi  Capitol  Consultant  ug igsoon ni suspended governor Gwendolyn  Garcia   ang  pasangil  nga  giligid  niya  og  kasaba  si Provincial Administrator  Eduardo Habin

Ang maong  panghimakak  gihimo  ni  Garcia  human  siya mapatik  sa mga pamantalaan  nga matud  pa misung siya  sa opisina  ni Habin  hinungdan  nga  nanglipaghong  ang  dagway  sa naulahi  sa kauwaw  dihang  iya  kining  giligid  og  kasaba  ug pamuyboy,  sumala  pa  sa pamahayag  ni acting governor Agnes Magpale.  

Apan  sa bahin  ni Byron  kini  nagkanayon  nga igo ra siyang mipahinumdom   kang  Habin nga co-terminu siya ni  Gwen busa angay  unta nga  adto  kini  mosuporta              kang  Gwen  ug  dili  kang  Magpale.

Giklaro  ni Byron   nga  kun  may  delikadesa  si Habin angay  kining  mo-resign  sa katungdanan kun  mahuman  na  ang  termino  ni Gwen  nungka  nga magpabilin  siya nga mosuporta  kang  Magpale.

Midugang  si  Byron  nga  iyang ginganlan  og  engrato  si Habin, walay ikabawos ug walay utang kabubut-on sanglit  ang  nag hire  kaniya  sa  pagka- provincial administrator  mao  man  si  kanhi  governor  Pablo Garcia ug   nagpadayon  sa panahon  ni suspended  governor  Gwen.

Sa iyang bahin si Habin nga atua na mag-opisina sa tapad sa buhatan ni acting Gov. Magpale miingon nga igo ra siyang mituman  sa iyang trabaho isip administrador sa probinsiya apan nagdumili na sa pagbungat og dugang pamahayag kalabot sa gisulti ni Byron  kaniya.

Gitataw   usab  ni Byron nga wala siya manghulga kang Habin o maningka .

Apan  si  Habin  sa  pagkakaron may  escort  na  nga  duha  ka  polis  nga  nagbantay  kaniya  basin  kun  balikon  siya og  sulong  ni  Byron. (BANAT NEWS)