CEBU, Philippines - Gipangandaman sa mga kadagkoan sa Vicente Sotto Memorial Medical Center (VSMMC) ang taliabot nilang kasaulogan sa kasumaran sa ika-100 ka tuig sa ilang pag-alagad sa mga masakiton sa lalawigan karong Enero 13.
Sa press conference nga ilang gipahigayon kagahapon ilang gipahibawo ang tema sa ilang umaabot nga kasaulogan sa centenial nga mao ang “VSMMC- A Century of Changing Lives: Our Passion; Our Purpose; Our Prideâ€.
Ang pagsilbi sa maong tambalanan ngadto sa mga pasyente nagsugod kaniadtong tuig 1911 nga nailhan pa kini sa ngalan nga Hospital Del Sur, nga nagpasabot Hospital of the South.
Taudtaod giusab kini ngadto sa Southern Islands Hospital, hangtud na sa kasamtangang ngalan nga mao ang Vicente Sotto Memorial Medical Center (VSMMC) agi og pasidungog kang Senator Vicente Sotto.
Si Dr. Gerardo Aquino Jr. ang hepe sa VSMMC mibutyag nga giandam na nila ang dugang expansion sa maong tambalanan uban sa pagbaton og modernong kahimanan niini aron kini makasilbi sa tanang kabus nga pasyente dinhi sa lalawigan ug sa kasikbit nga mga lalawigan. (BANAT NEWS)