City Hall namalit og surplus nga ligid?

CEBU, Philippines - Gihangyo  sa konseho sa Siyudad sa Sugbo ang Commission on Audit (COA) nga imbistigahon ang General Services Offices sa dakbayan gumikan kay nagduda sila nga surplus ang gipamalit niini nga mga ligid.

Kini  human  mabaniog  ang  tabi-tabi  nga giingong adunay  pipila ka mga konsehal nga  mireklamo gumikan  sa kadali nangaguba  sa  nadawat  nilang  mga   ligid alang sa ilang mga sakyanan. 

Ang  kagabok  sa maong  mga  ligid  nakapaturok  sa ilang  katahap  nga  kini  mga surplus hinungdan makabalda  sa  ilang  lakaw  ug  makalangay  sa ilang  biyahe  kay matanggong  man  sila  inigka-aberiya sa ilang  sakyanan  tungod  sa ligid ilabi  na  kun  mokalit  lang  kini  og  buto  o kaha hiyos.

Si Konsehal Alvin Dizon misaysay nga nakabantay usab siya nga ang mga piyesa sa iyang government service vehicle ang dali ra kaayo naguba ug nadiskubrehan usab niya kini nga dili orihinal busa lakip kini sa iyang ipaimbistigar. 

Sumala pa ni Dizon nga angayan kini nga susihon sanglit buhis man sa katawhan ang gigamit  sa pagpamalit niini busa angayan lang nga orihinal nga produkto ang madawat sa siyudad gumikan kay husto  man  ang  gibayad nila ngadto  sa mga supplier.

Samtang bahin  ni Engr. Rolando Ardosa, ang hepe  sa  GSO dali  kaayong  nanghimakak  sa maong  mga  pasangil  ug  mibarug  sa  pagpamatuod  nga puro brand new gayud ang gipamalit nila nga stock sa ligid  alang sa mga  sakyanan  nga  iya  sa  kagamhanan sa  siyudad. Gipasalig  usab  ni  Ardosa  nga  atubangon  niya  ang unsa  mang  imbistigasyon kalabot  niini kay  wala  nila sagoli  og  binuang  ang  ilang  panerbisyo  ngadto  sa katawhan. (BANAT NEWS)