62 anyos nadasmagan tipi

CEBU, Philippines - Namatay   diha-diha ang  usa ka 62 anyos nga lalaki dihang  nadagit  kini  sa nagbaguros nga sakyanan sa iyang paglabang sa dalan national sa barangay Cansaga, lungsod sa Consolacion   sa miaging  hapon. Ang namatay mao si Eduardo Matildo, minyo, nga nagpuyo sa barangay Jugan sa maong lungsod.

Samtang    ang sakyanan nga nakadasmag   sa biktima   usa  Sportage type nga  nagdala sa plate number YPT 388 nga gimaneho ni Joon Arthur Parinas, 27, ulitawo nga taga Jugan usab.

Si PO1 Alvin Velasquez nga maoy imbestigador sa  kapolisan sa maong lugar  nga nahinabi sa Banat News mibutyag  nga ang sakyanan nga gimaneho ni Parinas gikan sa dakbayan sa Sugbo.

Samtang  nagpaingon  siya  sa Consolacion  subay  sa highway  pag-abot  sa lugar  nga  nahitaboan  kalit  lang  milabang  ang  biktima. Gumikan  sa kaapiki  na,  natapsingan  gyud  niya  ang  biktima hinungdan  nga  nalagpot  kini  ug  sa pagtugpa  niini  sa yuta  nabundak  ang  ulo  sa sementadong  karsada  nga maoy  hinungdan  sa hinanali  niining  kamatayon.

Gitataw ni PO1 Velasquez   gipahiling  dayon  nila  sa  ilang municipal health officer   kun  puwede  pa  bang  dad-on  sa hospital  apan gideklarar   niini  nga patay  na  gyud ang  biktima.

Ang suspetsado  misuway  og  pabulhot  sa iyang  sakyanan  apan  nadakpan  ra  gihapon  sa kapolisan. (BANAT NEWS)