Negosyante og bala sikop

CEBU, Philippines - Nasikop  sa kapolisan  ang usa  ka negosyante  og  mga orihinal  nga bala  didto   sa barangay Poblacion lungsod sa Argao  sa miaging   gabii.

Ang nasikop mao si Arturo Lim Sesaldo, 68, molupyo sa maong lugar, igsoon  sa kanhi  mayor  sa maong  lungsod ug giingong dugay nang namaligya og mga orihinal nga bala sa nagkadaiyang armas.

   Sa pakighinabi sa Banat News ni PO2 Roderick Balili, sa Provincial Investigation and Detection Management Branch misaysay kini nga nakadawat sila og taho kalabot sa pagpamaligya ni Sesaldo og mga orihinal nga bala   ngadto  ni  bisan kinsang  tawo nga moduol kaniya.

Matud pa ni Balili nga gawas sa ilang nadawat nga taho, ila usab nga nasayran pinaagi sa imbestigasyon sa gwardiyang nang-hostage sa  kaugalingon  niyang pamilya sa milabay’ng semana nga didto diay kini namalit og bala kang Sesaldo alang  sa iyang armas nga calibre .45.

Dugang pa ni Balili tungod sa ilang nakuhang impormasyon, milusad  sila og buybust operation batok kang Sesaldo aron  pagsuta  kun  tinuod  ba  ang  nadawat  nilang  mga taho. Dihang  namatud-an  nilang  positibo  ang  tanan,  dihadiha giposasan  nila  ang  suspetsado  ug  gidala  sa ilang  buhatan  ug  gipaslak sa prisohan. Matud pa ni Balili nga atol sa buybust operation, mipalit  kunohay  ang  ilang decoy  og 15 ka buhing bala sa calibre .45 ug 15 usab ka bala alang sa .357 nga  ang  tanan   nagkantidad og dul-ang P1000.

  Nasakmit   usab nila  gikan  sa mga kamot ni Sesaldo ang mga bala   nga 124  sa calibre .45; 208 live special sa calibre .38; 37  sa .357; 53 sa 12gauge shot; 38  alang sa magnum rebolber ug 245 sa calibre .22 long riffle revolver.

Gibutyag usab ni Balili nga aduna silay nakita  nga ngalan sa namaligya  og bala sa karton nga gisudlan niini apan sa diha nga gisusi kini sa kapolisan mihimakak usab ang nahisgotang  negosyante   ug  miingon  nga wala  silay  suki  nga Sesaldo.

Sa pagkakaron,   padayon  pa  ang  imbistigasyon  nga gipahigayon  sa kapolisan  bahin  sa pamatigayon  sa suspetsado  kinsa  nag-atubang  og  kaso  nga  susama  sa ipahamtang  sa  mga  mamatud-ang  gun smuggler  o  gun  runner. (BANAT NEWS)