Amerikanong nagmaoy priso

CEBU, Philippines - Gidakop sa mga sakop  sa tourist police sa Lapulapu City Police Office (LLCPO) ang usa ka kanhi sundawo  nga Amerikano  kay  nagmaoy sa kahubog ug nanggakus sa usa ka staff nga babaye sa usa ka beach resort sa barangay Maribago sa dakbayan sa Lapulapu   sa miaging  hapon.

Ang   gibalhog sa prisohan  mao si Willy Charl Gros, 44, nga adunay kapuyo nga Filipina, usa  ka  retiradong  sundawo,  ug temporary nga nagpuyo sa barangay Kasambagan, dakbayan sa Sugbo.

Si PO1 Mark Nalcot sa tourist police sa kapolisan sa  Lapulapu nga nahinabi sa Banat News miingon nga ilang nadawat ang tawag sa telepono gikan sa usa ka opisyal  sa beach resort  kalabot  sa  Amerikanong  hubog  nga  nanghasi  ug  nagpunay  og  hiwasa  kay  gustong  mo-check in  sa  usa  sa  mga  lawak  sa  ilang  resort.

Gani  sa linya  pa lang daan  sa telepono  nabati  niya  ang  sipa  kaayong  tingog  sa suspetsado  nga nagkayuring  lang  sa gipangyawyaw  niini  gumikan  sa kalasbag.

Matud pa ni PO1 Nalcot nga dili pa paigo ang gihimo sa maong langyaw nga nakatugaw pa  kini  sa uban pa nga mga kustomer   ilabi na  dihang    miduol  kini  sa  usa   sa  mga kawani  nga babaye sa maong  beach  resort  ug  kalit  kining gigakus.

Misinggit  ug   mikisikisi     pag-ayo  ang  maong  babaye  ug  nangayo  og  panabang  sa  iyang  mga  kauban  kinsa  nakatawag   usab  dayon  og  kapolisan.

Matud  pa ni PO1 Nalcot   nga  dihang  ilang  giagni  ang  maong  langyaw  nga  mokuyog  kanila  ngadto  sa ilang  buhatan  nagbagulbol  kini  ug  isog  kaayo  nga  mibalibad  apan  ilang  gipugos sa pagkarga  sa ilang  sakyanan  ug  pag-abot  nila  sa ilang  buhatan  gideretso  kini  nila  pagpaslak sa prisohan  aron  dili  na  makamugna  pa  og  kagubot  ug  kadaot  sa palibot.

Ang  tukmang  kiha  giandam  na sa kapolisan  batok  sa maong  langyaw.  

(BANAT NEWS)