Level 2 drug pusher tiklo

CEBU, Philippines - Nagtingkagol sa karsel ang usa ka gihulagway  nga level 2 drug pusher human kini masikop sa kapolisan sa Regional Anti-Illegal Drugs Special Operations (RAIDSOTG)  sa dalan Spolarium, barangay Duljo-Fatima dakbayan sa Sugbo, sa miaging  gabii.

Ang nasikop mao si Rochelle Vequizo Castillo,  alyas Mamang, 36,  ug molupyo sa maong lugar.

Sa pakighinabi sa kapolisan sa RAIDSOTG   nasayran   nga sa sayo  pa nakadawat sila  og taho kalabot sa illegal  nga  negosyo sa  suspetsado  pinaagi  sa   pagpamaligya  og  shabu  hinungdan nga ila kini nga gipaubos sa tulo ka buwan  nga surveillance operation.

Human  nila  masuta  nga  positibo  ang  tanan, dihadiha gipahigayon  dayon nila  ang  buy bust  operation  ug  nasikop  nila  ang suspetsado  uban sa 39 ka  pakite  nga  gituohan  nilang shabu.

Matud pa sa kapolisan nga ang  suspetsado  dugay  na  nga nahimutang sa ilang drug watchlist isip   level 2  drug  pusher.

Gani, ilang nasayran nga makapagawas kini og 20 ngadto sa 50 bulto nga shabu  matag  adlaw  nga  nagkantidad  og  kapin kun  kulang P50 mil.

Sa pakighinabi sa mga  tigbalita, ang suspetsado miangkon  nga napugos  siya  sa pagdangop  sa maong  illegal  nga  panginabuhi  tungod  sa kalisud  sa iyang  pagpuyo.

Matud pa ni Castillo nga mokita siya og labing minus P650 matag gabii sa  iyang  baligyang  shabu.

Ang kapolisan sa RAIDSOTG nagdumili una sa pag-ila   sa  ngalan  sa  amo  ni  Castillo nga  maoy  nag-supply  usab  kaniya  og  shabu.

Sa pagkakaron nagkagulkol  na  sa prisohan  ang suspetsado  samtang  gipasaka  na  usab  ang  tukmang  kaso  batok  kaniya. (BANAT NEWS)