Nagpusil sa ulo patay

CEBU, Philippines - Patay ang usa ka lalaki nga gituohang naghikog pinaagi sa pagpusil sa iyang ulo gamit ang kalibre .22 nga armas sa dalan Duterte sa barangay Sabang, dakbayan sa Danao alas-10 pasado ang takna sa buntag niadtong miaging adlaw.

Ang namatay mao si Pelagio Pequero, 43, nga walay trabaho ug lumad nga nagpuyo sa barangay Lamac sa lungsod sa Consolacion kinsa bisita lamang sa panimalay ni Mario Almeres nga iyang higala.

Si P01 Faron Avila sa kapolisan sa maong dakbayan nga nahinabi sa Banat News miingon nga nagtabi pa ang managhigala apan sa pagbiya ni Almeres nadungog dayon ang usa ka sipang buto sa armas.

Sa pagsusi ni Almeres nahagba na si Pequero sa lantay nga nagkadugo ang ulo. Patay na kini pag-abot sa Danao Provincial Hospital. Hinuon dili pa kompirmado sa kapolisan kung naghikog ba gyud kini bisan dunay nakit-ang armas sa tupad niini. Girekomendar sa kapolisan nga ipa-awtopsiya ang patay’ng lawas ni Pequero pagtino sa hinungdan sa kamatayon niya. (EIM)  (BANAT NEWS)