3 armado ug may shabu sikop sa checkpoint

CEBU, Philippines - Tulo ka lalaki  nga  naglakip sa usa ka batan-on  nasikop   sa checkpoint  sa kapolisan  nga  nagdala  og  usa ka .38 kalibre  nga  revolver  ug  mga kahimanan sa paghingos  og  shabu   didto  sa national  highway  sa barangay Yati,  lungsod  sa Liloan sa miaging gabii.

Ang  mga suspetsado mao sila si Chester Sy, 37, minyo nga taga barangay Poblacion sa lungsod sa Consolacion, Franklin Apoya Romo Jr., hingkod, ug  16 anyos nga bayong-bayong lalaki  nga taga barangay Nangka sa lungsod sa Consolacion.

Si SPO2 Marcelino Servilla sa kapolisan sa maong lungsod nga nahinabi sa Banat News miingon  nga nagsakay sa motorsiklo ang tulo nga gimaneho ni Chester  Sy ug nahiagi kini sa ilang gipahimutang nga checkpoint sa maong dapit.

Matud pa ni SPO2 Servilla nga ila  kining  gipara  ug  dihang   gisil-ing  nila ang  driver’s license ni Sy,  nasuta  nila   nga  expire  na  kini. Unya  sa  ilang  paghiling  sa sakyanan  nakasigpat  sila  og  usa ka  pakite  nga shabu  ug  kahimanan sa paghingos         niini.

Diha-diha  ilang  gi-impound ang  sakyanan   samtang  ang  duha  ilang  gitanggong  sa prisohan  ug  ang menor  de edad  nga  kauban  niini  ilang  giindosar  ngadto  sa mga  tinugyanan  sa  Department of Social Welfare  and Development (DSWD).

Kasong  paghupot og armas  de fuego  nga  way  lisensya, pagdala  og shabu  ug kahimanan  sa paghingos  niini  ug  pagmaneho sa  motorsiklo  nga way  lisensya  maoy  mga  kaso  nga  isang-at  sa kapolisan  batok  sa  mga  suspetsado. (BANAT NEWS)