Driver giliog pagpusil

CEBU, Philippines -  Gitaopan  sa  usa ka bala   ang  liog   sa  usa ka  drayber sa  traysikad    dihang  gipusil  kini sa iyang  silingan   didto  sa barangay Looc, dakbayan sa Danao sa miaging  gabii.

Si PO3 Roselo  Campo sa kapolisan sa maong dakbayan miila sa biktima nga  si Anastacio Berdin Pagubo Sr., 37, ulitawo, apan adunay kapuyo nga babaye  sa maong dapit.

Ang suspetsado nga nagpusil sa biktima giila usab nga mao si Iboy Escudero, hingkod  nga nagpuyo sa nahisgotang dapit.

Dugang pa niya nga nahimong referee ang biktima sa nagdula og billiard sa nahisgotang dapit  dihang  kalit  lang  miabot  ang suspetsado  ug  sa  walay igong hinungdan  gipusil niini  ang  liog  sa    biktima sa  wala matino nga kalibre   sa armas.

Dali nga gidala ang biktima  ngadto sa Danao  District  Hospital apan human sa pasiunang pagtambal    gibalhin  kini  ngadto  sa Vicente Sotto Memorial Medical  Center sa dakbayan sa Sugbo.

Samtang ang suspetsado  dali usab   kaayo  nga  nakalayas  pahilayo sa maong dapit ug padayon pa kining gipangita sa kapolisan sa maong dakbayan. (/WC) (BANAT NEWS)