CEBU, Philippines - Gitinguha sa kagamhanan sa dakbayan sa Mandaue ang pag-ugbok og usa ka monument ni anhing Senador Manuel Cabahug Briones sa dakong hawan sa plaza kilid sa Rizal- Bonifacio Memorial Stage sa barangay Centro sa maong dakbayan.
Gibutyag kini ni Mayor Jonas Cortes atol sa 4th Manuel C. Briones Day sa miaging Biyernes nga ang kagamhanan sa dakbayan adunay igahin nga salapi alang sa maong proyekto karong tuiga.
Sa nasayran nga niadtong ika-120 nga kasumaran sa adlaw nga natawhan ni anhing Senador Briones ang mga opisyal sa kagamhanan sa maong dakbayan nga gipangulohan ni Mayor Cortes mipahigayon og floral offering sa lubong sa maong opisyal.
Mitambong sa maong kalihokan mao sila si Vice Mayor Glenn Bercede, Konsehal Editha Flores Cabahug, Konsehal Lollipop Ouano Dizon, Konsehal Jefferson Ceniza, Konsehal Elstone Dabon, Konsehal Jimmy Lumapas Daddy Suico ug uban pa.
Base sa ordinansa nga giaprobahan sa konseho niadtong Marso 9, 2009 gimando nga ang unang Biyernes sa matag bulan sa Enero sa matag sa tuig saulogon usab ang Senador Manuel Cabahug Briones Day.
Ang mga kabanay sa kanhi senador nga naglakip kanila ni kanhi Vice Mayor Carlo Fortuna nga apo niini, Esperanza Briones Blanco nga anak usab niining babaye mitambong usab sa maong kalihokan. (BANAT NEWS)