Soco mibisita sa mga senior
CEBU, Philippines - Gipakigtagboan ni magpapatigayong Glenn Soco ang mga lainlaing pundok sa senior citizen dinhi sa lalawigan sa Sugbo aron pagpaminaw sa ilang mga problema sama sa tambal ug inadlaw adlaw nga panginahanglan.
Gibutyag ni Soco nga namatikdan niya ang lain laing problema nga giatubang sa mga lolo ug lola sa kalungsoran ug dakbayan ilabina kay ang uban nila adunay gidawat nga ginagmay’ng allowance gikan sa ilang lungsod ug adunay ubang lungsod usab nga wala moayuda kanila.
Nunot niini si Soco misaad ngadto sa mga senior citizen nga kun mapili siya pagkabise gobernador sa umaabot nga election sa Mayo 2013 maningkamot siya sa pagpasar og balaodnon alang sa benipisyo sa mga lolo ug lola sa tibuok lalawigan.
Nagtinguha usab si Soco nga mangita og paagi nga makombinser niya ang mga nanag-iya og bus company nga mahatagan og libreng plite ang mga lolo ug lola nga mobiyahe sa siyudad ug probinsiya sa Sugbo.
Matud ni Soco nga mahimo niya kini ilabi na kun makalingkod siya isip bise gobernador kay ang South BusTerminal ubos man sa pagdumala sa probinsiya sa Sugbo ug adunay lakang nga gihimo nga ang North Bus Terminal ipailawom na usab sa pagdumala sa probinsiya.
Nagkanayon si Soco nga gawas sa mga senior citizen nga mahatagan nga malibre sa plitehan, plano usab niyang lakip sa makapahimulos unya sa libreng plitehan ang mga persons with disabilities (PWD’s) kun mga tawong adunay diperensya sa panglawas.
Nagkanayon ang batan-ong magpapatigayon nga kining tanan maoy iyang priority legislation kun kahatagan og kahigayonan nga modaug ug makalingod siya isip bise gobernador human sa eleksyon sa Mayo.
Gawas niini gipasalig usab ni Soco nga iduso ug ipatuman ang nag-una niyang programa ang Trabaho ug Asenso nga magtutok nga makasud og trabaho ang mga batan-on aron makatabang sa panginahanglan sa ilang pamilya.
Apil na niini ang Livelihood ug Entrepreneur alang sa mga sectoral group ug pagpalambo sa sports kon paugnat sa kusog sa mga batan-on ug uban pa. (BANAT NEWS)
- Latest
- Trending
