Byron ‘nanghagad’ og sukmagay ni Garbo

CEBU, Philippines - Nipatim-aw kagahapon sa Kapitolyo ang igsuon niini nga si Byron Garcia aron pagpanalipod sa iyang igsuon nga gisuspensong si Gob. Gwendolyn Garcia. Si Byron wala molilong sa iyang kasuko ngadto sa kapolisan sa gihimo diha sa iyang igsuon.

Ang nakapaaghat kang Byron pagduaw kang Gwen kagahapon mao ang presensiya sa mga sakop sa Special Weapons and Tactics (SWAT) sa Kapitolyo nga gidudahan nilang gamiton aron pwersahon sa pagpagawas gikan sa iyang buhatan ang gobernador.

Gihagit hinoon ni Byron si Police Regional Office 7 Director, Chief Supt. Marcelo Garbo Jr., sa pagpakigharong kaniya ug dili sa iyang igsuong babaye. “Why is he taking up a fight sa akong sister, babaye man ni?” matud pang Byron.

Midemanda usab si Byron kang Garbo ug sa mga sakop niining nagbantay sa Kapitolyo sa pagsaludo sa gobernador isip piniling opisyal sa gobiyerno bisan kini suspendido.

“Kaning garboso nga Gen. Garbo nga pagka-garboso gyud intawon ning tawhana, di na gani mosaludo sa akong igsuon, pagkahilas baya ana niya,” matud pang Byron.

Matud pa ni Byron nga sama sa terorista ang kaaway ni Garbo ug kapolisan sa pagbutang sa mga sakop sa SWAT sa Kapitolyo.

“Magsinumbagay nalang kaha ta, tan-awon nato’g isog ba gyud ka,” hagit ni Byron kang Garbo.

Mao kini labing unang pagbisita ni Byron sa Kapitolyo sukad mitumaw ang tensiyon sa Kapitolyo kapin sa tulo na ka semana ang nakalabay diin matud pa niya naniid lang siya sa panghitabo.

Samtang gibutyag ni Byron ang posibleng pagkaguliyang sa mga piniriso sa Cebu Provincial Detention and Rehabilitation Center gumikan sa gidangatan karon sa gobernador.

Kini ang hinungdan nga daling gibisitahan sa kasamtangang Gob. Agnes Magpale ang CPDRC aron pagtino sa maong kasayuran.

Ang mga sakop sa  Special Reaction Unit sa Cebu Provincial Police Office ang gipakatap usa sa palibot sa CPDRC kagahapon.

Gipahimangnoan ni Byron ang mga molupyo sa kasikbit nga mga barangay sa Guadalupe ug Lahug sa posibleng pagpang-eskapo sa mga piniriso. “Tagaan nato og trabaho si Garbo unsaon niya pag-handle ning jailbreak,” dugang pa ni Byron kinsa mao ang nagdumala kaniadto sa maong bilanggoan. (BANAT NEWS)