Dispatser sa ‘illegal terminal’ sa Mandaue gi-sampolan og dakop

CEBU, Philippines - Gihingusgan sa dakbayan sa Mandaue ang pagpanakop niining mga dispatser sa kadalanan tungod kay usa sila sa hinungdan sa pagbara sa trapiko tungod kay ang mga drayber mo-urong usab sa mga dapit diin mag-estambay ang mga dispatser.

Niadtong milabay’ng gabii, usa ka dispatser ang gidakop diha sa dalan A.C. Cortes Avenue sa barangay Cambaro,  dakbayan sa Mandaue.

Ang nadakpan mao si  Gerry Aninipoc, 56, biyudo nga lumad nga nagpuyo sa barangay Pajo, dakbayan sa Lapulapu ug  ang nagdakop mao si Rosendo Naparate nga traffic enforcer sa Traffic Enforcement  Agency  of Mandaue (TEAM) nga maoy nakaakto niini ug gidala kini sa Presinto 1.

Sa nasayran nga ang paghingusog sa pagpangsikop sa mga dispatcher nga mag-atang sa mga jeepney stop nga maoy manawag og pasahero nga bugti usab sa sensiyo nga ihatag sa drayber sa matag larga niini.

Si Edwin Ermac nga maoy executive officer sa TEAM  mihingusog sa pagsikop sa mga dispatcher sa kadalanan  sanglit usa man kini sa mahimong hinungdan nga mamugna na hinuon ang illegal terminal.

Sa pakisusi nga gihimo sa Banat Manobela sa siyudad sa Mandaue ang mga ilegal nga terminal hinimo-himo ra sa mga dispatser nga tuyong mopahunong sa mga pasaheroan aron kini manawag og pasahero.

Ang mga drayber nga hakog sa mga pasahero motubay usab sa gihimo sa dispatser bisan nasayod na silang ang ilang lisensya maoy gipusta sa maong ilegal nga terminal.

Daghan nang mga pasahero ang nangreklamo sa Banat Manobela kabahin niining mga ilegal nga terminal diha sa dakbayan sa Mandaue gumikan kay dili lang sa mamugnang problema sa trapiko kondili hasta ang mga pasahero malangay na sa ilang biyahe.

Sagad sa mga pasaheroang nang-reklamo mao kadtong mga pasaheroang trabahante nga mobiyahe padulong ug balik sa dakbayan Sugbo, Consolacion ug dakbayan sa Lapulapu. (BANAT NEWS)