TEAM sa Mandaue nang-hire og dugang enforcers

CEBU, Philippines - Ang Traffic Enforcement Agency of Mandaue (TEAM) nagkinahanglan og dugang 20 ka mga traffic enforcers nga maoy mohulip sa 20 usab ka kanhi traffic enforcers nga gitangtang sa ilang trabaho tungod sa nagkadaiyang hinungdan.

Kini maoy nahipos nga kasayuran sa Banat Manobela gikan kang Roger Paller ang Public Information Officer (PIO) sa maong dakbayan.

Gipasabot ni Paller nga naglakip sa mga hinungdan sa pagkatangtang sa mga traffic  enforcers mao ang kakulang sa disiplina,  kanunay nga mopalta sa trabaho, nakainom og ilimnong makahubog atol sa ilang pagtambong sa trabaho ug uban pa.

Matud pa niya nga ang mga traffic enforcers nga ilang dawaton nga aplikante mao kadtong college level, nagpuyo sa dakbayan sa Mandaue, nagbaton og pamarog nga lima ka tiil ug lima ka pulgada alang sa mga lalaki ug lima ka tiil ug upat ka pulgada usab alang sa aplikante nga mga babaye.

Dugang pa ni Paller nga ang mga gikinahanglan nga dad-on sa mga aplikante nga nagtinguha nga mahimong traffic enforcers sa TEAM magdala lang og 2 x 2 ID picture ug magdala usab sa ilang pinil-apan nga bio data sheet.

Isumitir lamang kini ngadto sa TEAM Office nga nahimutang sa Mandaue City  Sports and Cultural Complex sa sitio Tribunal sa barangay Centro sa maong dakbayan. (BANAT NEWS)