Pasko nakalangay sa trabaho— Radaza

CEBU, Philippines - Ang taas nga bakasyon sa miaging Disyembre maoy  nakalangan   sa  pagpasemento sa mga guba nga dalan sa kabarangayan sa dakbayan sa Lapulapu.

Kini  gipadayag ni Mayor Paz Radaza kinsa miingon  nga kuwang  sa trabahante  ang  kontraktor   sa maong  panahon  tungod  kay  namakasyon sila.

“Nisabot lang pod ta sa kontraktor kay miingon man nga namakasyon man iyang mga laborer,” ni Mayor Radaza pa sa iyang pamahayag. “Ug usa pa sad, nakita sad nato nga mograbe ang inconvenience sa mga tawo  nga panahon man sa holiday  season.”

Kahinumdoman   nga adunay 10 ka  lugar  kansang  karsada  gubaon  kaayo  ug  mao  kini  ang  gikontrata  sa  kagamhanan  nga  sementohon  sa  usa ka pribadong  kontraktor.

Matud      pa  ni  Radaza  nga ang  pagtrabaho  sugdan  na  unta  niadtong  Disyembre 20, 2012  sumala  sa  kontrata  nga  gipirmahan  niya  tali  sa pribadong  kontraktor.

Pipila  sa   mga  karsadang  sementohonon  mao  ang  nahimutang  sa barangay Agus, Pajac, ug  Maribago.

Napugos  ang   mayor  sa pagpasemento  niini  human  madawat  ang  petisyon  nga  pinirmahan  sa kagatusan ka  molupyo  sa nahisgutang  mga  barangay  nga mireklamo  gumikan sa pagkagubaon  sa  ilang  karsada  nga  unta  nagbayad  man  sila  og  hustong  buhis.  (BANAT NEWS)