Ulitawo nag-inom og alak namatay

CEBU, Philippines - Patay nang nakit-an sa iyang silingan ang   usa  ka ulitawong  guwang  nga nagbuy-od  luyo sa  usa  ka  tindahan didto sa Sitio Katambisan, barangay Corazon, sa lungsod sa Catmon niadtong Biyernes  sa udto.

Ang napalgang patay na mao si Martin Colita Bontilar,70, ulitawong gulang ug nagpuyo sa barangay Can-ibuang sakop sa maong lungsod.

Si PO1 Ralph Bracero sa Catmon Police Station mibutyag  sa Banat News   nga  ang biktima   kinsa  gituohang  giatake   sa sakit  gisuwayan  og  dala  ngadto  sa  Juan Dosado Memorial Hospital sa bangay Damolog  diin didto kini  ideklarar sa mga doctor nga dead on arrival.

Gimandoan sa kapolisan  ang  mga  tagtungod  nga  ipa-autopsy  ang  biktima  pagsuta  kun  wala ba kini  tuyoa  og  patay. Nasayran  nga  sa wala pa kini  hikit-ing  patay  nakit-an   pa kini  sa  mga  silingan   nga nag-inusarang  nag- inom og alak sa tindahan  ni Rotillo Aristang.

Hinuon  nasayran  nga walay kontra  sa ilang  lugar  ang  biktima ug gituohan  nga giatake  kini  sa  altapresyon   o kaha  sakit  sa kasingkasing. (BANAT NEWS)