CEBU, Philippines - Ang popular na kaayong sinagop ni Mayor Socrates Fernandez gireklamo na usab ngadto sa kapolisan sa dakbayan sa Talisay tungod kay nanakop og duha ka trak de karga nga kargado og bas.
Ang nagdala sa maong mga sakyanan dihang gisikop ni Joavan Fernandez, sila si Jovey Salazar, 33, taga sitio Pungsod, barangay Lawaan 1, siyudad sa Talisay ug Julius Abad, 45, nga taga barangay Duljo-Fatima, dakbayan sa Sugbo.
Ang sakyanang gimaneho ni Salazar maoy unang gisikop ni Joavan base sa blotter sa Talisay City Police Station didto sa sitio Laray, barangay San Roque, sa maong dakbayan niadtong Miyerkules sa gabii.
Si Salazar nagpadagan sa Misubishi Fuso dump truck nga gipanag-iya ni Irene Pabatao nga kargado sa bas dihang gipara ni Joavan.
Unya sa walay igong rason miingon si Salazar nga gimandaran siya ni Joavan nga paderetsohon ngadto sa city hall compound ang sakyanan tungod kay adto niini susiha ang delivery receipt nga gikan sa Department of Environment and Natural Resources (DENR).
Si Abad maoy tag-iya sa dump truck nga kolor blue nga nagtangag sa plakang MDH-505 nga dunay kargang bas ug gimaneho niadtong higayona ni Leandro Jaberina gipara usab ni Joavan niadtong Biyernes sa gabii ug gipadala usab deretso ngadto sa city hall compound nga walay igong hinungdan.
Si Inspector Margienette Yosores sa traffic division sa kapolisan sa Talisay mibutyag sa Banat News nga gipabuhian dayon niya ang maong mga dump truck human masuta nga walay problema ang mga papeles niini.
Sa laing bahin, ang Banat News misuway og tawag kang Joavan aron makuhaan og pamahayag bahin sa maong mga insidente apan dili ma contact ang mga numero niini sa cell phone. (BANAT NEWS)