70-anyos gipatay sa apo

CEBU, Philippines - Gikulata hangtud namatay ang usa ka 70-anyos nga lola sa iyang 34-anyos nga apo kinsa mikawat usab sa iyang mga kwarta ug kabtangan diha sa pinuy-anan sa biktima diha sa sitio Bangkal sa barangay Unidos sa lungsod sa San Francisco isla sa Camotes niadtong Biyernes sa alas 6:59 sa buntag.

Ang biktima nga patay nang naabtan sa mga kabanay mao si Francisca Pepito Donaldo, 70, samtang ang suspek mao ang iyang apo nga si Florencio Donaldo Jullisca, 34, padayon pang gipangita.

Matud ni PO3 Ronald Wahing sa Operations Branch sa Cebu Police Provincial Office (CPPO) subay sa spot report gikan sa San Francisco Police, ang biktima ug ang suspek nag-inom diha sa balay sa biktima sa wala pa ang hitabo.

Gikatahong samtang nag-inom gimaymayan sa biktima ang apo apan nasuko og maayo ang suspek ug mipunit kini og kahoy ug gipusposan sa ulo ang biktima sa  makadaghang higayon hangtud nga nakuyapan.

Pagkahuman niini misibat ang suspek ug naabtan na lang sa mga anak ang biktima nga patay na ug dunay dakung samad sa agtang.

Sa gihimong pakisusi sa kapulisan nadiskubrehan nga nahanaw ang P2 mil niini nga kwarta sa biktima ug nagkatag na ang mga butang sa biktima.

Ang suspek nadakpan hinoon atol sa gihimong hot pursuit operation  ug nabalhog na sa karsel ug gikatakdang pasakaan og kasong robbery with homicide. (BANAT NEWS)