Lalaking naputos og dinunggaban sa Talisay wa pa gihapon mailhi
CEBU, Philippines - Wala pa mailhi hangtud kagahapon ang patay’ng lawas sa usa ka lalaking natusak sa dinunggaban ug napalgan niadtong Miyerkules sa gabii diha sa sitio Ranger, barangay Pooc, dakbayan sa Talisay.
Si PO3 Benedicto Lasque nagkanayon kagahapon nga wala pa nila mailhi ang maong patay’ng lawas nga walay bisan unsang dokumento nga makatabang sa pag-ila kaniya.
Ang maong patay’ng lawas gidala sa mga polis ngadto sa Saint Francis Funeral Homes sa barangay Bulacao, Talisay human kini mapalgi sa usa ka Ryan Navarro kinsa miagi diha sa lugar nga nahitaboan.
Gihulagway sa mga polis nga gibana-banang nagpanuigon sa 30-anyos, dunay gitas-on sa pamarog nga 5’4, puti-on og pamanit, yagpison og lawas, nagsul-ob og kolor itom nga short pants ug stripes nga itom ug puwa nga sweat shirt.
Gituohan sa mga polis nga ang kriminal dunay dakung kasuko sa biktima ug posibleng nagkuyog kini diha sa lugar nga nahitaboan.
Nabantayan usab sa mga polis nga dunay timailhan nga ang biktima misukol sa iyang killer tungod kay aduna kini mga defense wounds diha sa mga kamot.
Na-recover usab sa mga polis gikan sa lugar duol sa patay’ng lawas ang usa ka parisan sa kolor stripe blue nga tsinelas ug usa ka kolor brown nga sandal nga walay pares nga gituohang iyaha sa kriminal. (Brenda D. Batuto/EIM) (BANAT NEWS)
- Latest
