Ex-convict nasakpang nagluklok og shabu priso

CEBU, Philippines - Nagtingkagol sa Talisay City detention cell  ang usa ka ex-convict human kini masakpi  kagahapon  nga nagloklok og shabu   sa iyang  pagbisita  sa usa niya ka paryente   nga napriso  sa Talisay City Jail sa barangay Maghaway, dakbayan sa Talisay.

Ang suspetsado mao si Richard Baguio, 34, taga sitio Hawod, barangay Bulacao, dakbayan sa Talisay.

Si Richard   nasakpan  sa  guwardiya  dihang  paghinol  sa  iyang bulsa    napisilan niini ang pakete  sa shabu.

Busa  diha-diha  gisikop  dayon  ni JO1 Ronel Rivera  ang maong    suspetsado.

Ang bag-ong jail warden sa TCJ nga si Chief Inspector Gil Inopia mibutyag sa Banat News  nga si Gerald Baguio  kinsa  maoy  giduaw  ni Richard, napriso  tungod sa kaso   nga may labot sa gidiling drugas.

Samtang  si Richard napriso usab  sa mao  gihapong  prisohan  ug  gisuta  pa  sa kapolisan  ang  hinungdan  sa pagka-priso  niini.

Matud ni Inopia nga  gipaabot  pa  nila  ang  resulta sa gipahigayong  eksaminasyon  sa   PNP Crime Laboratory   sa nasakmit  nga  shabu  gikan  kang Richard  aron  kapasakaan  dayon  kini  og  kaso  kun mamatud-an.

Sa laing bahin, si Richard nga nahinabi sa Banat News kagahapon mihimakak sa ulahing pasangil batok kaniya.

Apan giangkon niya nga niadtong tuig 2005 napriso siya sa TCJ tungod sa kasong kalapasan sa Section 5 sa Akta Republika 9165 kon pagpamaligya og ginadiling drugas.

Apan  niadtong  Marso, tuig 2008  gi-dismiss ang maong kaso hinungdan nga nakagawas siya gikan sa prisohan.

Gibutyag usab ni Richard nga ang iyang ig-agaw nga si Gerald nasikop sa mga polis tungod   gihapon sa ginadiling drugas. (Brenda D. Batuto/WC) (BANAT NEWS)