Enforcer gipadasmagan sa van bitiis paksit

CEBU, Philippines - Usa ka traffic enforcer sa dakbayan sa Mandaue ang gisuwayan pagdasmag  sa  sakyanan sa usa ka drayber kinsa nasuko  nga gibadlong kay nakalapas  sa balaod  sa trapiko   sa miaging  buntag.

Ang biktima mao si Melvin Ochea, 36 , molupyo  sa H. Cortes St.,  Barangay Subangdaku sa maong dakbayan ug sakop sa Traffic Enforcement Agency of Mandaue (TEAM) samtang ang suspek mao si Clinton Estelloso, 29, nga   taga Matumbo, Pusok dakbayan sa Lapu-lapu.

Ang suspek   nagmaneho  sa armored van sa Dasia Security Agency   ug  pag-abot  niini  didto  sa  mga eskina sa  Plaridel St. ug G. Ouano St. sa Brgy. Umapad  gisita kini ni  Ochea.

Apan  imbis  mohunong, mipasirit  hinuon  kini  og  padagan   sa iyang  sakyanan puntariya  kang Ochea.

Gumikan  sa kaabtik  sa biktima  wa maintimano sa pagdasmag ang tibuok  niyang  lawas  ug ang  iya  rang tuong bitiis  maoy  napaksit.

Ang  ubang  mga  traffic  enforcer  maoy  migukod  sa suspetsado  ug  didto  kini  nila hidakpi sa eskina  sa  G. Ouano St. ug Cabahug St. sa Brgy. Ibabao ,

Sa pagkakaron   nagtingkagol na kini sa Station 5 sa Mandaue City Police Office (MCPO)  ug  giandam  na  ang  kaso  nga  ipasaka  batok  niini.(Gianelli Ann Cañete USJR Intern/WC) (BANAT NEWS)