Programa sa pagprotiher sa kabus gilusad sa DSWD

CEBU, Philippines - Ang  Department of Social Welfare and Development(DSWD)milusad og   usa  ka  panukdanan  aron  katabangan   ang  mga    pamilya  nga  nanginahanglan  og proteksyon.

Kini  pinaagi  sa gipirmahang   Memorandum of Agreement (MOA)   sa maong  ahensya  alang sa implementasyon sa Modified Conditional Cash Transfer (MCCT),  nga  mohatag  og hinabang   sa  mga  kabus kinsa  wala mahilista   sa ilang orihinal nga  listahan  sa gihatagan og  hinabang pinaagi  sa gitawag  nga Conditional Cash Transfer (CCT).

Matud  pa ni DSWD7 Regional Director  Ma. Evelyn Macapobre  nga  base  sa record sa DSWD,   may kapin  sa  3,000 ka  pamilya  nga  nahimutang  ubos  sa  Families In Need Of Special Protection (FNSP) sa tibook Central Visayas kinsa  maoy  makapahimos sa dakong serbisyo gikan sa gobiyerno   uban  sa  non-government organization.

Miingon  siya nga ang mga pamilya nga gikategorya isip FNSP mao kadtong   walay  mga  balay  ug  nanimuyo  nalang  sa  kadaplinan sa kadalanan  tungod sa tumang kakabos kinsa dili usab benepisyaryo sa regular nga CCT.

Kauban  niini  ang  mga indigenous migrant families,  kun  mga   pamilya  sa  mga  lumad, ingon  man pamilya  kansang  mga  anak  may apan sa panglawas ug usab mga pamilya  kansang  mga  anak nga  mga  bata pa  gipugos  sa pagpatrabaho  gumikan  sa kalisud  sa panginabuhi..

Midugang  si  Macapobre  nga  lakip usab   nga makapahimus ning  maong programa kadtong mga pamilya kinsa naapektohan sa natural nga kalamidad.

Gitino  ni  Macapobre  nga  ang katuyoan sa MCCT mao ang pagtabang sa mga batang  libod -suroy  sa kadalanan aron ibutang sila sa mas malahutayon, desente, ug permanenteng pinuy-anan  kauban sa ilang pamilya.

“We will bring them back to schools and facilitate their regular attendance including access to Alternative Delivery Mode and other special learning modes, facilitate access to health and nutrition services through regular visits to the health center,”  matud pa ni Macapobre.

Gibutyag   usab niya nga ang mahimong benepisyaryo unya niining maong programa  patambongon   usab  sa mga  Family Development Sessions  uban sa  ilang  mga  anak   nga nanginahanglan og espesyal nga proteksyon alang sa gitawag  nga  normal psycho-social functioning.

Ang mga nahimong kaalayon sa MCCT mao ang Bidlisiw nga girepresentahan ni Executive Director Lolit Ganapin; Forge International nga girepresentahan ni Orlando Carvajal ug usab Share-A-Child nga girepresentahan ni Atty. Nina Valenzona. - /WC (BANAT NEWS)