Glenn Soco paluyohan sa mga drayber sa Mandaue

CEBU, Philippines - Hugot nga suporta ang gipasalig sa kadagkoan ug mga sakop sa Mandaue City Federation of Tricycle Drivers Organizations (MCFOTRIDO) ngadto sa Mandauehanon nga si Glenn Anthony Soco alang sa pagka bise-gobernador sa umaabot eleksiyon karong Mayo.

Kini ilang gipadayag atol sa ilang tigum nga gitambongan mismo ni Soco.

Si Manuel Malinao, ang presidente sa grupo, nagkanayon nga niadtong 2010 nga nagpapili si Soco sa samang posisyon, wala niya nakuha ang suporta sa taga dakbayan sa Mandaue gumikan kay ang iyang kaatbang nga si anhing bise-gob. Gregorio Sanchez Jr., kaliwat man usab og mga Mandauehanon.

Ang kaatbang karon ni Soco mao sila si Bise-Gob. Agnes Magpale ug Ramon “Boboy” Durano IV, nga parehong taga dakbayan sa Danao.

Si Magpale nga mao karon ang acting governor ang kapares ni Hilario Davide III ubos sa Liberal Party samtang si Durano ang kapares ni Kong.  Pablo John Garcia ubos sa One Cebu Party nga maoy partido ni Soco sa 2010.

“Hinaut tabangan nato kauban sa mga miyembro kampanyahan nato si Glenn Soco,” matud pang Malinao.

Matud pa ni Malinao nga dako usab kaayo ang natabang sa pamilyang Soco sa dihang nahimong konsehal sa dakbayan sa Mandaue ang iyang amahan nga si Guillermo “Momoy” Soco.

Mapasalamaton si Soco sa suporta nga gipadayag sa mga drayber og mga traysikol sa maong dakbayan samtang iyang gipasalig ang tabang sa ilang panginabuhian.

“Angay gyud suportahan ang mga tricycle drivers di lang sa dakbayan sa Mandaue kun dili sa tibouk gayud nga lalawigan sa Sugbo kay ang pag-drive og tricycle usa ka dungganon nga trabaho diin daghan ang ilang mga kabataan nga nakatapos na sa pagtungha ug daghang pamilya ang nasuportahan tungod niini,” matud pang Soco.

Ang sektor sa mga drayber ang usa sa hatagan og pagtagad ni Soco sa higayun nga makalingkod siya sa katungdanan. – (BANAT NEWS)