REPUBLIC ACT 10054: Gidaghanon sa makalas sa aksidente sa motor gipaabot nga momenus

CEBU, Philippines - Ang sayo nga kamatayon ug makaguba sa kinabuhing mga traumatic injuries ang nagpaabot sa mga magmaneho og motorsiklo nga dili magsuot og standard safety helmet, sumala pa sa mga eksperto.

Ang implimentasyon karong Enero 2 sa Motorcycle Helmet Act gipanglantawang  makatabang unya sa pagpamenus sa gidaghanon sa mga tawong makalas o makaangkon og grabeng kadaot sa panglawas sa mga aksidenteng may kalambigitan ang motorsiklo.

Sumala pa sa pagtuon, tanang mga helmet bisan paman standard safety helmet dili garantiyang mabuhi ang usa ka motorista kung makasugamak og aksidente sa kadalanan.

Apan sumala pa sa Motorcycle Safety Foundation sa Amerika , dako kaayo ang tsansa ang usa ka rider nga maluwas gikan sa grabeng kadaot sa ulo kung kini madisgrasya itandi sa tawong wala magsuot niini.

Nagpasabot kini nga kung ang magsuot gani og standard safety helmet dili pa garantisadong maluwas gikan sa kamatayon o grabeng kadaot sa ulo, unsa nalang kaha ang dili gyud magsuot og saktong helmet unya madisgrasya?

Base sa pagtuon, ang mga helmet adunay kaugalingong mga limitasyon, magdepende kini sa impact sa pagbangga ug sa kung unsa nga matang og gi-haiton sa butang nga nakatusok sa helmet ug uban pa.

Atol sa Final Briefing sa mga enforcers ning  bag-ohay lang kalabot sa Republic Act 10054 o Helmet Law, si Land Transportation Office (LTO-7) Regional Director  Raul Aguilos naglaom nga mogamay kung dili man ugaling hingpit mawala ang mga mamatay sa aksidente sa motorsiklo.

Matud pa ni Aguilos nga 80 porsiyento sa mga aksidente sa kadalanan karon nalambigit sa motorsiklo, kadaghanan sa maong gidaghanon ang nakalas tungod kay wala sila magsuot og protective crash helmets.

“These would have been prevented had they worn the protective, standard, and prescribed helmets,” kini matud pa ni Aguilos.

"Which means that all -- deputized agents, PNP, and we should implement RA 10054,” dugang pa ni Aguilos.

Sa bahin usab sa Department of Trade and  Industry (DTI-7),  gipadayag ni Regional Director  Asteria Caberte nga aduna na silay natala nga 23,000 ka  mga helmets nga nabutangan og ICC stickers sa  kinatibuk-ang 27,000 ka mga helmets sukad pa sa Hunyo  tuig 2012.

Gibutyag ni Caberte nga dili na sila manginlabot pa human ma-implementar ang maong balaod tungod kay ila  naman usab nga nabuhat ang kutob sa ilang makaya sa  pag-atiman sa mga drayber sa motorsiklo nga mipaproseso sa  ilang helmets.

Ang maong final briefing gisalmotan sa dul-an usa  ka gatos ka mga deputized agents sa       LTO.

Mitambong usab sa maong final briefing ang mga opisyales sa City Traffic Operations ug usab si Management Office Director Rafael Yap ug lakip na si LTO Assistant Regional Director Arnel Tancinco. – (BANAT NEWS)