BOT buot nga anha mobutang og buhatan sa SRP

CEBU, Philippines - Ang mga kadagkoan sa rehiyonal nga buhatan sa Bureau of Treasury mohangyo sa kagamhanan sa Siyudad sa Sugbo nga idonar sa ilang buhatan ang 1,000 square meter lot nga nahimutang diha sa South Road Properties.

Sa gipadala nga  BOT ngadto sa buhatan ni Mayor Michael Rama ang maong hangyo ug panghinaut sa maong ahensya nga positibo ang tubag niini.

Kahinumduman nga pipila na ka mga buhatan sa gobyerno ang naglaraw nga buot mo-puwesto sa SRP sama sa Court of Appeals, ingon man usab ang University of the Philippines. Gitun-an pa sa siyudad ang giingog proposal sa BOT. Nasayran nga naglaraw usab kaniadto si Mayor Michael Rama nga ipahimutang sa SRP ang pipila ka mga departamento sa Cebu City Hall ug usa na niini ang sports area.

Target ni Rama nga mogama og special board aron maoy mo-focus sa pagtoon sa nagkadaiya nga transaksyon sa SRP.

Una na nga gipadayag sa mayor nga dili langayon ang pagpabaligya sa mga luna sa SRP aron daghang mga Sugbuanon ang makabenipisyo niini. - /EIM (BANAT NEWS)