Siyudad nangandam na sa sinulog

CEBU, Philippines - Gibutyag ni Mayor Michael Rama nga lapad na nga pagpangandam ang gibuhat karon sa siyudad sa Sugbo alang sa umaabot nga Sinulog kung diin kapin usa ka milyong bisita ang gipaabot nga moanhi sa dakbayan.

Usa usab sa gipangandaman karon sa kagamhanan mao ang pag-abot  unya sa mga out of town contingents alang sa umaabot nga 2013 Sinulog Grand Mardi Gras.         

Padayon na usab karon ang pagpamili sa mga eskuwelahan nga mahimong puy-an sa mga dancers nga naggikan gawas sa Sugbo.         

Pipila sa mga posibleng istaran nga tunghaan naglangkob sa  Abellana National School, City Central, Zapatera, Guadalupe Elementary School ug Labangon Elementary School ug uban pa nga mga tunghaan nga duol lang sa Cebu City Sports Center.        

Ang  Cebu City Health Department mosusi sa palibot sa tunghaan hilabi na sa tinubdan unya sa tubig, ang Department of Public Service nga maoy moayo sa mga suga nga nadaot ug mga pansayan,  ingon man usab ang Cebu City Police Office nga maoy mobantay sa area.           Mohimo usab karon og koordinasyon ang siyudad  sa nagkadaiyang tunghaan alang sa pagpadala nila og mga volunteers nga motabang sa pagpatuman sa crowd control atol unya sa long procession ug sa grand parade.

Panghinaot usab sa mayor nga magmalinawon gihapon ang Sinulog 2013 sama sa nahitabo sa nangagi nga mga Sinulog. Matud pa niya nga dako kaayo og natampo ang maong kalihukan sa pag-ugmad sa turismo sa siyudad.

Gibutyag usab sa mayor nga kinahanglan nga kanunay gyud nga hatagan og importansya ang mga relihiyosong kalihukan  sanglit mao kini ang sentro sa selebrasyon sa kapistahan ni Sr. Sto Niño. (/EIM) (BANAT NEWS)